玉

当我知道海洋公园开新酒店后，就上网订佢哋嘅中菜厅试吓。周未最快都要订到8月中，唯有慢慢等！终于等到订位嘅日子啦！酒店装修好有渡假feel, 入到去已经好开心！中菜厅个名得一个字「玉」，位于酒店二楼。虽然订位时要求要窗口位，但系到访当日就安排咗我哋坐入面嘅梳化位。如果可以坐响窗边，望住个无敌海景食点心就非常正啦！由于得2个人，见到点心样样都想食，但系又食唔到咁多，就打算叫套餐。好彩叫嘅时候多口问声经理点心可唔可以跟人头上，经理好好咁话特别安排比我哋，咁我哋最后就叫左散点心啦！几款点心都唔错，达酒店中菜水准。肉骨茶小笼包有肉骨茶味，但系我觉得味道唔系同小笼包咁夹，原味应该好啲。XO酱肠粉炒得好惹味，软硬适中。蟹盖方面，价钱都算贵，但系好足料，蟹肉好鲜味。龙带玉梨香个名好特别，原来系里面好似虾丸夹左片新鲜梨炸，食落口感几得意。我哋食完点心冇叫炒嘢，不过又担心转头好快饿，就叫碗鱼汤稻庭面打下底，都几好味。最后，紧系要食埋甜品先完美啦！总结嚟讲，成餐好满意！环境新，装修靓，坐得舒服唔在讲，望出去仲有个无敌海景。嘢食方面，一般高级酒店价钱，食物质素都达标，蟹盖系有惊喜！服务都系酒店水准，招呼周到。