熊野日本料理 (已結業)

呢间新开嘅日本料理系晌大围站对面，虽然晌街尾，但系都几易揾到。佢入面嘅座位唔多，入口走入嚟时有一列屏风阻隔，面街𠮶边就开咗个唔大唔细嘅玻璃窗，总算唔会俾街外人一眼睇晒。由陈设睇嚟，佢哋应该系想营造一个同街坊式食店唔一样嘅用餐环境。打开餐牌，刺身、寿司、烧物、扬物、一品料理等等都有，算系间多元化嘅日本料理，定价就比较进取。我哋叫咗几样嚟试，盐煮牛舌切得够厚，上面有啲黄芥辣，可以点酱汁再夹意大利青瓜一齐食，酸酸甜甜咁。彩虹刺身卷用咗吞拿鱼同三文鱼等等三款唔同颜色嘅刺身做馅，另外仲有牛油果同蟹籽，颜色比平时嘅卷物丰富，口感味道就几讨好。什锦天妇罗分别系海老、日本青椒、番薯、南瓜、冬菇同蟹柳，炸皮都几薄脆，感觉唔错。烧茄子烧得软绵绵，上面仲搽咗柚子酱同少少辣粉，食起上嚟微甜都几清新。