正宗上海生煎皇 (已結業)

之前睇杂志已经见到呢间餐厅生煎包好出名，今日系大埔揾食期间竟然见到开咗分店，二话不说即时食返次啦。套餐一个主食再加一款小食包嘢饮，平均都系五十蚊左右，都几抵食。呢度主打小笼包，每张台都会有贴纸教你点样慢慢食，唔驶惊渌亲。小食当然系呢度最出名嘅生煎包，虽然唔系好大个，卖相金黄，记得千祈唔好大啖咬落去，因为一定会渌到个口，要慢慢吹冻先好食，生煎包内馅超多汤汁，皮唔会太厚，得两个真系唔多够喉。主食叫咗酸辣汤面，份量都算大碗，呢度嘅酸辣汤配料多，可能加咗面味道沟淡咗，个人觉得可以再辣少少，咁就更加开胃。冻豆浆只系微冻，味道唔太甜，感觉无落咁多糖健康啲。呢度不愧为生煎皇，生煎包真系好好味，下次有机会真系要试埋佢个小笼包。