牛極 (庇利金街) (已結業)

出去庙街买洗头水，行吓条街水静河飞，同往日人来人往真系两个世界，都冇乜特别嘢想食，原本谂住行返去佐敦道食马华，路经庇利金街见咁几间食肆都多人喺门口等位，同太座一个眼神交流就行上去睇吓，有间双皮奶有间食鸡汤翅，最后拣咗呢间食牛扒嘅，都要等咗一阵间先有位，本身都多人帮衬加埋限聚令冇办法!原来呢度系用块火山石煮熟牛扒，上枱时只有1成熟，随个人喜好自己煮至几成熟，唔错!有个自助位置可以攞沙律、面豉汤、酱汁同白饭，仲有紫菜粉可以加落饭面，我试过觉得唔错!牛柳食落肉汁丰富，有D咬口，又唔算太韧;牛肩排比牛柳较为嫩滑，但肉味一样，睇吓个人口味喜欢，枱面上仲有3樽调味料以供选择，个人喜欢加盐吊一吊味，好味到可以同太座一齐添饭，性价比高嘅一间食店!