樂園粉麵專家

营业中

休息中

寻日心血来潮，食晏时行咗4个字走去食，一去到座无虚席，好彩一条友，摄咗个位，一坐底即点牛杂河。人太多关系碗粉都过咗15分钟先上枱。牛杂份量绝不欺场，金钱肚四大片、一粉肠一肥肠加埋蒡肺各一大旧，仲有两片小肚。河粉满到大力啲夹都泻咁泄。个汤充满牛味，清而香浓，加埋佢哋嘅独门（估：加咗冬菜）辣椒油（记住要落渣）真系正到爆。河粉略嫌太厚，唔够滑，应觉系粗犷型系列。金钱肚好入味，淋得嚟有咬口。肥肠好多膏，一咬甘香十足。粉肠油香入味。肺弹牙爽脆。不得不提牛蒡口感香糯，质感实净，唔会一夹就散。我虽然唔算系常客，不过只要知自己会去开𠮶头，就一定整番碗牛杂粉。