潮丸 (已結業)

本人超钟意食牛，嚟到呢间潮丸，有咁多款牛既唔同部位食就啱晒我啦。嚟之前一早check过呢度嘅牛三鲜系好出名嘅，所以嚟到谂都唔使谂就叫咗牛三鲜河粉($55)，仲有牛爽腩捞面($70)。牛三鲜嘅意思即系牛筋、牛腩同牛肚。嚟到果然冇令我失望，牛筋唔会好韧，又唔会淋晒。牛腩够咬口，好有牛味。牛肚食落索索声，简直完美！牛爽腩，系普通牛腩再爽啲既部分，口感介乎牛肚同牛腩之间，好特别啊，一试就爱上！小食叫咗炸鱼蛋($28)、炸鸡翼($38)、萝卜($28)、时菜($28)同炸云吞($50)。炸鱼旦好香，热辣辣嘅时候放入口，好似咬紧气球咁，好正。好钟意呢度嘅炸云吞，好足料，咬开就见到成只都系虾！唔系用猪肉填满就算嫁。另外叫碗面仲可以加$3就有杯热饮，朋友叫咗热柚子蜜。晚市唔算多人，而且价钱真系非常经济实惠，有时想食多几款小食，又唔想荷包出血，呢度啱晒呀。