熨烤達人 (已結業)

本身见到都有几多正评，于是打电话去订位，一接通电话，话想订位，咁好正常食店实会问你日期同时间，当我一讲日期，时间都未讲，食店就即刻话：得喇，唔驶订位，walkin实有位。（其实应该听到呢句之后都觉得怪怪哋，打电话订位咁多次，第一次听到咁嘅回覆，一般餐厅就算知道自己个场唔爆，都好少咁讲，点都会扮吓嘢帮你订，佢咁嘅回应即系同客讲自己唔多人帮衬。）当晚入到去，个侍应啲态度都已经麻麻，真系觉得一般茶餐厅仲好过佢。个场装修系几特别，不过坐得一啲都唔舒服，张枱矮，铁桶凳，超硬。打开餐牌选择唔多，于是叫咗个2人套餐，帆立贝同真雪花牛。讲到食物，其实都好普通，无咩特别，就算个雪花牛食落口都无肉味。到埋单嘅时候，当然系举手同侍应讲埋单，一般餐厅都会拎张单埋你等你俾钱，但呢度嘅回应系：得喇，出嚟收银度俾啦，咁样同茶餐厅真系无分别。不过分别就系，我今餐成千二蚊，但系佢嘅服务仲衰过茶餐厅，而且仲要加一，真系完全唔明喺零服务之下，连俾钱都系自己行出去俾，咁多仲要俾加一服务费，呢间餐厅真系完全唔得，建议大家真系唔好去帮衬，以免中伏。