不要對我尖叫，日常茶間， (中環大廈) (已結業)

台式饮品店喺香港系长青树，由我学生时代到依家都仲系人气不减，越开越多，越开越多花款变化，但可惜我到依家都暂时未揾到一间特别令我惊艳嘅台式饮品，而呢间亦唔例外。呢间店据了解系台湾艺人詹子晴(丫头)有份开嘅，除咗系攞明星开嘅店嚟做卖点之外，佢另外嘅卖点系饮品入面嘅珍珠系白色而唔系黑色同埋有芋圆可以选择。坦白讲我觉得啲选择就几特别，但味道就真系唔特别。芋圆同外面嘅甜品店食到嘅味道差太远，比起上嚟真系好细粒令到芋圆烟烟韧韧嘅口感大大减低，咬两下就冇咗。冇晒食芋圆时咬下咬下嘅乐趣。不过都唔系完全冇优点嘅，佢胜在杯嘢饮入面好多粒芋圆，亦因为细细粒唔怕塞住饮管口，但要注意唔好饮太快因为会唔觉意吞咗几粒。白玉珍珠论味道同口感就好过芋圆，但同黑糖珍珠比就弱好多。除咗颜色特别可以影相呃like之外，我真系谂唔到有咩特别过人之处。反而杯茶最好饮系桂花味好香，亦饮到片片桂花，钟意饮桂花茶就真系可以饮下呢间。之于玫瑰奶茶都唔错，但花茶嚟讲个人就钟意饮桂花多啲啦。