Bamboo Thai (如心廣場一期)

营业中

休息中

行过如心广场，本来想试吓非常出名嘅段纯贞牛肉面，但望见门口𠮶条早早出现嘅超长人龙，唯有放弃呢个念头，转战呢间同样人气旺盛嘅泰国菜，门口有得拎飞，行一阵街返嚟就差唔多可以入座。餐厅食物选择唔少，仲有啲比较少见嘅菜式，例如黄姜脆炸鱿鱼、招牌冬阴鸡翼、泰式红咖喱鱼饼同火山排骨之类，而且价钱唔贵，嗌多几个小菜都唔会肉赤。鱼饼一客四件，加入红咖喱同泰式香料，香口弹牙，配上酸酸甜甜嘅泰式酱汁，非常开胃。冬阴公汤酸辣醒神，香料嘅味道亦够重，而且材料丰富，非常抵食。见几乎每枱都有嗌呢道火山排骨，当然要凑下热闹，一上枱果然气势十足，份量超大，细份嘅都足够三四个人分享。排骨每件都大大件，煮到够哂软腍，配上特制嘅酸甜酱汁同大量葱蒜，惹味开胃。泰式大虾炒金边粉份量虽然唔算多，但炒得干爽够火候，大虾亦可口弹牙。先生食泰国菜一定唔少得青柠梳打，加入九层塔取代一般会用到嘅薄荷叶，令到成件事更加泰式，清爽解渴。玫瑰黑糖姜茶系我嘅至爱，香甜暖胃，最适合饭后慢慢叹。餐厅嘅食物质素唔错，而且够晒创新，价钱亦合理，加上舒适嘅环境同优质嘅服务，系享受泰菜嘅好选择。