滿樂潮州 (美麗華廣場1期) (已結業)

好耐无食过中菜，前几日见到尖沙咀美丽华新开满乐潮州，就转下口味食下潮州菜。今次人少少就点左一个细份既卤水鹅肉拼盘，但其实份量都唔细，而且仲齐哂几款，难得卤水入味得黎完全唔会过咸，鹅肉肥瘦亦算适中。炸双枣都系潮州酒家的平常菜，如果未食过可能唔知系咩，但其实即系虾枣与蟹枣，有d似平时食既炸虾丸和炸蟹饼，不过就会多左马蹄，所以咬落去会更加爽口。太极素菜羹净系睇卖相都觉得好有心思，精致得黎又好中华风，捧到上枱都竟然完全无变形 XD 侍应仲细心到分完两碗但都无捞乱颜色，味道清淡，但质地比较稠，所以每人分完两碗都觉得好饱下。平时出街食多数拣炒饭，不过今次见到有葱蒜牛肉崧煨饭就试下，比炒饭会湿身d但又唔会太油，里面都几多牛肉片，而且肉质都几滑唔韧，老人家都咬到。食亲潮州菜都会叫煎蚝饼，见到有款系用九肚鱼做烙饼，当然要贪新鲜，出乎意料原来好味过蚝饼，煎到脆脆地好香口，九肚鱼无食蚝咁重口味，更加突出到烙饼味道。甜品就拣左反沙芋，出面果层系脆脆地既白糖，入面包住芋头，不过糖衣果层就略为厚左d，食完几旧会觉得比较甜。