探花 (已結業)

近排爱上咗一盅两件嘅港式点心所以就四围睇有冇啲特色点心店可以试下，但系食得多总系觉得开始无咩新意。今次嚟到铜锣湾呢间探花，佢嘅点心同出面嘅点心好唔同，好有特色。 而且最重要系佢嘅装修同传统茶楼唔一样，行简约现代风，入到去嘅感觉比较似喺西餐厅饮high tea多过食中式点心。话梅车厘茄子，酸酸甜甜嘅话梅汁浸住已去皮嘅车厘茄， 车厘茄充满著话梅味又juicy又好食， 仲好开胃。虾肠粉，虽然度度地方食港式点心都会有虾肠粉，但系佢嘅豉油应该系特制嘅，比普通豉油特别鲜甜，配新鲜嘅虾十分好食。竹炭雪山叉烧包， 黑漆漆嘅叉烧包覆盖住酥皮，外脆内软，而且佢嘅叉烧馅，亦都整得好香。晶莹虾饺， 佢嘅虾又大又新鲜， 虾饺皮亦都好烟韧， 十分好食。咸蛋黄竹炭萝卜丝酥饼， 同出面嘅萝卜酥 一样，但系佢系用黑炭做嘅酥皮，配上咸蛋粉，好好食，萝卜丝清甜配咸蛋黄粉， 简直一流。松露片牛肝菌腐皮卷， 露笋配牛肝菌加上炸到脆脆嘅腐皮， 口感一流。黑虎掌花素饺，作为素饺其实即系什菌饺， 充满菇味， 口感好好。最欣赏系佢嘅灌汤饺，花蟹肉罐汤饺除咗有蟹肉碎仲有虫草花， 汤亦十分鲜味。整体上水准十分唔错。