黑木 (已結業)

平时成日去金巴利街买韩国货&嘢食，见到一间好似得度门写住黑木但唔知食咩嘅餐厅，令到我好好奇就上网睇下食D咩，原来系Omakase厨师发办而且以串烧做主题，于是我就同Honey嚟试吓。我哋订咗6点钟，由于时间尚早餐厅都未有其他客人，环境静静地而且灯光好柔和个感觉好舒服。由于系Omakase厨师发办，所以就唔使拣食咩，真系煮到埋嚟就食。小食：一款小食似鳕鱼零食，但超香脆，配上沙律酱好好味。前菜：花螺苹果沙律，花螺以酱汁煮几惹味，日本苹果真系超爽口又甜，配埋青瓜好啱夏天食。北寄贝两食先上咗清酒煮北寄贝，北寄贝肉质超爽，味道鲜，食完仲可以饮埋个汤，好鲜味！然后再嚟北寄贝嘅裙边烧，第一次以烧嘅方式，都几特别。鸡软骨免治鸡肉酿冬菇配上温泉蛋，将温泉蛋黄铺到冬菇上一齐食超美味，而且免治鸡肉内有软骨，口感好特别。花椒油烧牛舌，第一次呢个配搭，牛舌爽口。薄猪腩片配莴笋，猪腩片烧到甘香少少脆口。汤乌冬原来系一片嘅乌冬，人生第一次食，原来可以做到咁滑（因为我夹咗好多次都跣走咗）最后食埋个甜品，大满足！