莆田 (美麗華廣場2期) (已結業)

一段时间冇去尖沙咀，发现美丽华入边嘅铺头转晒，都几多嘢行。新开嘅食肆都好多选择，行过呢间喺新加坡拎过米之莲一星嘅餐厅，食福建菜几特别就排队试吓。等左十几分钟就有位，有一碟酸菜做前菜，咸咸酸酸几开胃。餐厅做紧海蛎节推广，188可以拣两款用生蚝整嘅𩠌。我哋叫咗江口家乡海蛎汤同九层塔香焖海蛎。汤即系番茄蛋芫荽生蚝汤，出奇地一啲都唔腥，生蚝好鲜甜，唔错。姜葱焖蚝改咗用金不换，又几出色，香气十足，虽然生蚝细细只，但味道又惹味蚝肉饱满，出色。百秒黄花鱼，名副其实师傅功夫菜，黄花鱼滑到不得了，煮嘅时间非常准确。钟意食鱼嘅男朋友食唔停口。兴化米粉，系好幼细嘅米粉好似台湾早餐店炒米粉。但呢一个系豪华版，入边有好多海鲜好似虾，蚬，元贝等等，值得一试。酥炒芋芯，芋头够粉，外面糖浆落得刚刚好，唔会一大层死甜，反而多咗一种香脆。另外值得一提嘅系茶都同外边唔一样，问侍应先知今日我哋饮嘅徐杞子菊花茶，养目安神！总括嚟讲呢间店舖菜式有特色，下次会再嚟试吓其他嘢先。