越港正宗越南湯粉 (已結業)

「隐世」「小店」「美食」「邪恶」「超人气」，相信大家见到呢啲字眼第一时间都会谂起喺乜假期收咗人钱去写嘅食评会岀现。喺写紧呢篇食评时个标题本来系「湾仔隐世越南美食」，但之后谂多阵觉得太做作，太似打手会写嘅标题，太似乜假期啲标题，所以最后改咗做依家你见到嘅标题。Ok，废话讲完，可以入正题。越港喺湾仔玩具街隔离，近湾仔街市嘅一条横巷入面。当日带咗朋友去湾仔见识一下玩具街，佢好开心咁睇咗几个钟，买咗两盒模型，我唔太清楚啲模型岀面卖几钱，不过朋友话有啲款平过佢平时喺旺角买。佢开心就得啦，睇完都已经3点几，边行边揾食咩，行到近街市嘅后巷见到有间越南嘢，而且2点半之后有下午茶餐，掂，入得。坐低之后问老板娘午餐同下午茶餐嘅生牛河有咩分别，老板娘话下午茶平啲同细碗啲。因为都迟咗食晏，就叫碗细啲嘅河粉啦。牛肉普普通通，但系碗汤有惊喜，牛肉味比想像中浓，而且唔似系味精，食完之后唔会好颈渴。48蚊有咁饱嘅一餐，仲要系已经细碗咗，好饱好满足。