丸作食茶 (德民街) (已結業)

我記得呢間茶飲店當初喺銅鑼灣開張嘅時候，我同女朋友排左成半個鐘先飲到。後來佢喺其他地方都開咗分店，加上人氣已經冇咁勁，所以都飲過好幾次了。我認為丸作嘅茶底本身都唔差，味道幾清香。而佢最出色嘅就係佢啲珍珠，除咗係即整之外，珍珠亦有好多款口味揀，當中仲有啲係期間限定。啲珍珠除咗好fancy之外，佢個口感都好正，因為好Q彈好好咬。呢日我叫咗四季春配仙人掌珍珠同焦糖珍珠。我印象中價錢都只係$2x頭，幾抵飲。仙人掌珍珠就唔係好食得出係乜嘢味啦，不過就係粉紅色。至於焦糖珍珠呢就甜甜地，所以好易認。我每次行過丸作，都會忍唔住買返杯飲吓👍。