Kachimushi

营业中

休息中

今日放假，特登同女朋友去拍拖，听朋友介绍喺元朗𠮶间好特别好舒服嘅Cafe，即刻带佢去试吓。kachimushi 地址喺锦田永隆为77号地舖，喺元朗搭小巴过去，原来真系好方便几分钟就到，去到锦田邮政局对面就揾到间Cafe店°餐厅地方虽然唔系好大，但系感觉非常舒适，有一种好宁静好舒服嘅感觉。松露蟹肉粘酱，将蟹肉酱搽上面包，除咗食到面包好酥脆，仲有阵阵嘅蟹肉香味，一丝丝嘅蟹肉食落去都有好有口感，估唔到蟹肉味同黑松露味可以咁夹。火箭菜沙律，加蘑菇 ，火箭菜非常新鲜，食落去好爽甜味道，加上芝士粉同沙律汁令到味道更加有层次，蘑菇亦都烧到啱啱好。蟹肉薯仔沙律加牛肉，呢个薯仔沙律，我真系好钟意食，入口有阵阵嘅蟹香味同薯蓉作为一体，无论口感同味道都非常出色，牛肉肉质都好嫩滑，配搭埋薯蓉，令到味道更加有层次。柠檬蛋黄酱蓝莓班戟，班戟做到好香脆，柠檬汁同蓝莓令到味道更加香更加清新，热辣辣，整体嘅味道真系好夹。咖啡都系重点嘅推介，无论外观同埋味道都做得好出色，咖啡味道又香又浓，入口好幼滑。放假去到咁舒服嘅地方食一个午餐，真系叉满电，令人身心都好放松。