阿土伯鹽水雞 (已結業)

成日都觉得荔枝角冇嘢好食，原来D2 place有呢间细细哋嘅台湾菜。星期日下昼2点左右去，好彩都有位堂食。叫咗个皇牌套餐，有肉燥饭同埋1/4只咸水鸡，另外拣嘅小菜系甜不辣、冻豆腐，饮品我拣咗冻珍珠奶茶（+$4），总共$69。肉燥饭都唔错，食完都够饱肚。另外一位朋友叫咗拉面，试咗一啖觉得都几好食，不过面会捞埋落啲小菜度，唔知系咪心理作用，觉得食饭应该会饱肚啲🤣平时少食开台湾菜，唔知个冻豆腐原来唔系滑滑哋𠮶种，同预期有少少落差。甜不辣嘅口感就几正，几好嚼。鸡嘅份量都真系唔少，唔会得两三块咁吝啬。总体嚟讲都几钟意。