甜入心 (已結業)

炎热晚上, 食完饭心思思想食返个冻甜品, 呢间之前食过都觉唔错, 今次系等位期间望住门口呢个大餐牌谂定食咩先, 呢个设计又几贴心, 可以比客人等位期间谂定食咩!店内面积唔大, 食客多数食完就埋单走人, 唔驶等好耐就入得! 侍应送上餐牌! 身为榴梿忠粉的我, 差唔多每次黎到都叫呢个榴梿飘香椰皇子 ($49), 原个椰皇作器皿, 底层为清甜既椰皇冻, 食落口感滑嘟嘟, 顶层系一球香浓榴梿菓肉, 软滑香甜, 菓味颇浓, 再配上粒粒脆口珠珠, 几重口感真过瘾!椰皇子系列仲有呢一个成员, 咖啡出浴椰皇子 ($36), "出浴"既意思系指无原个椰皇作器皿, 呢款可以选冻/暖暖地, 底层亦系清甜既椰皇冻, 份量不变, 顶层为焦糖布丁, 配以粒粒啡啡啫喱粒, 咖啡味唔算太浓, 个焦糖布丁甜度适中, 再食埋个清甜椰皇冻, 几种甜度系舌头上混战, 各有千秋!呢度都有咸食供应吐司系列中点左呢个颇受欢迎既黑松露吐司 ($42), 卖相颜色几缤纷, 有少少薄饼感觉, 材料都几丰富, 食到有菇菌, 青瓜, 黑松露酱, 芝士及木鱼碎, 食到黑松露酱既独特浓香味, 配合埋芝士及木鱼碎, 味道几特别, 个吐司亦够香脆