Spoon by Alain Ducasse (已結業)

Item: Spoon by Alain Ducasse
Rating: 4
Author: 奥志雷

158 食记

味道

环境

服务

卫生

抵食

2563

尖沙咀

$801以上

法国菜 Fine Dining 酒店餐厅

108

奥志雷

等级4

2.1K

难得凯彤有时陪我过生日，揾间高级法国餐厅浪漫一下先。上纲左拣右拣，由菜色、服务到理境都细心看一遍。好，就试 Spoon 啦。相约 K11 见面，就双双途步前往洲际酒店。Book 左七点钟 table，侍应姐姐带我地步入餐厅。华丽既装潢，十分宁静既环境，暗淡既灯光营造浪漫既气氛，无敌大海境尽收眼底 ﹗

姐姐带我地到预先安排好既位置，就交由另一位侍应哥哥接待。一轮简单介绍及查询有否对任何食物敏感后，我地 order 支有汽矿泉水再望下 menu 有咩好野食先。我已经有最后决定喇，似乎 order dinner set for 2 较为实际，可以用比较经济既价钱试多几款美食与甜品，因为第 1 次黎都未有咩特别既 idea，如果 order 错野就惨喇，免得浪费左个 quota 同金钱啦。环顾四周，闲日黎讲食客都算少喇，现在只有三四枱，大多数以一对对男女为主。

餐前小点 3 款，侍应哥哥以广东话加上英语详细介绍食物既材料与制作，非常专业，遗憾地我英语程度低未能完全明白，不过都十分感谢。无花果曲奇，味道好夹，面头清香多汁无花果撞上脆口略甜既曲奇，完美既配搭。芝士夹饼，用 3 种唔同既芝士配搭而成，各有各独特既香气与质地，幼滑与硬郎于一身，芝士味余香强烈，不其然发出赞叹之声。樱桃果冻，上面系新鲜樱桃盖著下面一小片樱桃果冻，入口清新，酸甜味皆有，可为将会来临既第 1 道菜作预备。

餐前小吃，肉桂馅饼，泛著清淡肉桂味道，外脆内软，我一向都对依类炸物麻麻，不过几好食噃。海盐旋风饱，酥皮薄薄劲松化，食落脆到沙沙声，好鬼 high。面包浓厚既牛油味环绕整个空间，外层脆卜卜，里面软塾非常。面包味香浓新鲜，加上海盐手做牛油，绝！控制住自己唔可以再添食呀，如果食面包食饱左点算好，连头盘都未开始呢。Rosie，无酒精既 mocktail。新鲜士多啤梨蓉调制，似果汁。

忌廉青豆蓉，作为开胃菜真系唔错，听侍应哥哥介绍系唔知咩青豆蓉咩忌廉柠檬叶混合啰，哈哈。忌廉幼滑厚身，散发出青豆及柠檬叶香味，非常醒神。红桑子忌廉羊奶芝士汤，今次换来位洋妞姐姐全英语介绍菜色，咩红桑子咩忌廉，真系唔好意思，我已尽力听架喇，thank you very much。总之好好味啦！羊奶芝士应该系淡软芝士类，因为味道不呛不霸道，温和而带著清香。

芝士洋葱鸡汁贝壳粉，好可爱呀 ﹗第一次见咁细粒既贝壳粉呢，而且系找第一碟赞既贝壳意粉，坚坚坚好味，要拍手欢呼！贝壳著得弹弹的，非常有弹性，令我联想到广告中经常提到既要几弹有几弹呢。而且佢地凭著天生骄人既兜形身材，每一粒都满载芝士鸡汁湿润地集体跳入口中。洋葱甜美、鸡汁清爽、芝士咸香，打得火热，美味 ﹗

Basil cooler，薄荷味跟 Basil 比例均匀，同样突出。其实我感冒中，鼻塞好辛苦，谂住叫杯薄荷味可以通一通，但完全无效呢，仲更加辛苦。系㖞，感冒要饮暖或热饮品呢，可以舒缓气管，忘记了。第 1 轮排山倒海既攻势可以稍作休息喇，系我地歇歇之余，可以享受下现时宁静同浪漫既气氛，而且恰巧幻彩庆香江开始，欣赏下激光表演帮助消化都好。

甜椒南瓜花龙虾汁松子仁烩蓝龙虾，万众期待既第 1 道名贵主菜终于都现身喇 ﹗现时侍应哥哥跟洋妞姐姐会不时交替招乎及介绍佳肴呢。蓝龙虾居然系令人意想不到既新鲜度，好肯定唔系雪藏货。海水味浓郁，入口爽弹有嚼劲，龙虾既鲜甜味失控地系口腔度横冲直撞，超级美味 ﹗各具特色既配菜混得非常出色，清新既感觉非笔墨能够形容，南瓜花独特既幽香清甜使我完全唔知道如何演绎，总之非试不可 ﹗再加上甜椒爽甜、松子仁脆口，多角度多层面既攻击，我只可以投降罢了 ﹗

鸭肝并牛柳配黑松露牛肉汁，黎个 standard dish 试试先，我都非常喜欢食牛架，洲际既 Steak House 牛扒非常出名，但唔知道洲际既 Spoon 又如何呢？鸭肝并牛柳配黑松露牛肉汁，牛扒一向食 rare 3 成熟，外面要煎得热腾腾够香口，里面要微暖鲜红色，咁就最靓喇。rare 3 成熟完全半点都难唔到大厨既手艺，非常满意。鲜嫩红肉滑滑的，散发淡淡牛肉味道，肉汁像泛滥般不停涌出 ﹗外层香口 juicy，牛味比生牛肉更浓厚更深沉，每一口肉汁激射。占上少许黑松露牛肉汁，牛味更发挥得淋漓尽致，无得弹 ﹗有趣地厨师谂到将鸭肝配上胀卜卜又非常薄既空心面包，可去油腻感，有创意又特别。鸭肝当然不及鹅肝肥美油润，没有大量油脂，所以食落会较干及硬身。味道组合好满意，酸酸甜甜加点面包味，亦泛著鸭肝油香。

头盘歇一歇，依家完左主菜再歇一歇，就到最后既甜品时间喇。侍应哥哥跟洋妞姐姐收拾好枱面，预备好食甜品既餐具，我地都非常急不及待喇。车厘子果冻，车厘子 jam 垫底，淋上车厘子汁，铺上金箔，全部都系熟透既车厘子，只有甜味无酸味，好食。车厘子雪芭，车厘子味道清淡，食落透心凉。朱古力棒子酱脆条，超正呀﹗朱古力味道非常浓郁，有软有硬又有脆，仲有金箔添，好好味呢 ﹗

自家手做棉花糖，绝无任何添加或防腐剂，两款卷系透明玻璃饼中储存，好似蛇饼一样，哈哈。洋妞姐姐成条取出再每款剪出两小块放系我地面上，入口棉滑，而且爆炸一般迅速溶化，好鬼得意，微甜清爽不浊，真系食得出的新鲜味道。法国人真的非常注重每餐作为 ending 既甜品呢，未试过会咁多款式，林林总总、包罗万有，我地已经好饱喇，食唔晒喇。个外卖盒好靓㖞，打包左好多朱古力返去呢。多谢凯彤亲手画既生日咭，thank you。