Cafe Whale (已結業)

星期六晚揾地方食饭，虾子饼提议去呢度食汉堡包，佢话平时晏昼都有同同事食，觉得整得好好，叫我一定要试吓。大概7:15就到达，铺头细细，只能够容纳8至10个人。等咗大概5分钟就有位。叫咗个软壳蟹香草扁意粉，一个南瓜汤，仲有个安格斯牛肉汉堡。先讲个意粉，味道唔错，软硬程度来讲可能系鬼佬心目中会林左少少，但我觉得都OK。软壳蟹炸之后感觉上仲有好多汁。可能我一向比较细食，啲酱汁比较多油，所以只系食咗大半，其他嘅就俾咗虾子饼。个安格斯牛肉汉堡好香，面包好明显用心toast 过，牛肉味道都唔错，都几juicy。个人喜好要再加多啲酱汁南瓜汤就一般啦，可能因为我不嬲都唔太钟意南瓜。讲到服务，店员都好有礼貌，而且好细心。见我哋两个人，仲帮我地将个汉堡包切开咗一半。香港仔嘢嘅餐厅类型一向好少，都系中餐多，鬼佬野更加少之有少，难得有间汉堡包/意粉，仲做得咁有心机，下次再嚟一定要试吓个龙趸汉堡包。