Vision 8

营业中

休息中

今日喺荃湾做完嘢，就揾个附近返工嘅朋友食个饭见吓面，地胆就带我嚟呢间Vision 8。朋友话呢间西餐厅喺区内都几受欢迎，好彩我哋入座时间尚早，7:30后已经座无虚席。点菜后，店员先奉上餐包，系三款唔同嘅面包，有软身有脆口，再配埋软牛油一齐食，已经能够唤醒我哋嘅味蕾。同女性朋友食饭，就特别钟意叫个沙律，餐厅嘅黑板上写上厨师推介嘅烧牛肉罗马生菜炸洋葱圈配蜂蜜芥茉蛋黄酱，我哋就一于试吓。平时食开嘅沙律通常都系配烟三文鱼或者烧鸡之类，呢个沙律系配烧牛肉加炸洋葱圈，配搭清新唔油腻，烧牛肉配上佢嘅蜂蜜芥茉蛋黄酱就更加开胃。我想食生蚝，但朋友唔食生嘢，所以就叫咗酥炸生蚝，新鲜炸起外脆内软而且好鲜味，配合他他酱一齐食真系非常夹。主菜我哋就拣咗小元贝西兰花忌廉汁烩意大利饭配加拿大海胆。带子同海胆都好鲜甜，意大利饭混入忌廉汁，再加上西兰花等蔬菜，可以减去油腻感。另外仲叫咗苹果木烧西班牙黑毛猪鞍扒，份量非常多。烧烤过嘅西班牙黑毛猪鞍扒有格仔纹理，充满香烤嘅味道，而内里仍然保持住肉汁。旁边除咗有蔬菜，仲有忌廉薯片，比起薯蓉或薯条更加惹味吸引。