財記海鮮火鍋活魚刺身

营业中

休息中

大角咀埃华街出名美食多， 之前嘅母亲节， 就同咗屋企人一齐去打个边炉， 出去食番餐好嘅，唔使老妈子煮饭咁辛苦。呢间《财记海鲜火锅》门面相当之吸引，门外嘅鱼缸放满咗生猛嘅海鲜，主打活海鲜刺身。今晚我哋就叫咗个清清地而又健康嘅【虫草花冬瓜鸡锅】， 啱晒 炎炎嘅夏日， 解暑又解热。 呢个冬瓜鸡锅用料十足，厚切嘅冬瓜原个放入锅内， 上面就放咗半只鸡， 当汤滚起之后， 冬瓜就慢慢煮到淋身， 而且易吸收咗鸡汁嘅精华美味。 虫草花有益健康， 令汤更加之清甜。当汤滚起之后可以先食鸡， 咁就可以食到最嫩滑嘅鸡肉啦。重头戏牛肉就嗌咗【本地手切肥牛】同【本地金钱展】， 两者都各有特色。 本地手切肥牛肉质嫩滑， 色泽红润，唔会有筋。个人觉得本地金钱展比本地手切肥牛牛味更加浓郁， 肉质较为爽口， 而且切得较薄， 轻轻滚一滚就食得。另外呢个【中山脆鲩骨腩】亦同样值得推介， 脆鲩骨腩唔算多骨， 而且连皮嘅位置更系非常之爽口，咬落索索声。打边炉又点少得吸汤嘅【台式冻豆腐】呢？ 冰豆腐健康又索汤， 将汤汁嘅精华吸收， 而且又高蛋白质， 够晒营养。另外亦都有我至爱嘅【即炸响铃】， 响铃即叫即炸，炸得金黄香脆， 豆味香浓。