肥姐小食店

营业中

休息中

两日前又再出旺角，上次只影到个招牌，今次揾到个好位，连个改良咗嘅纸兜都影埋，虽然可能有机会出意外（前面位姐姐万一向后一褪，咁就大件事啦😱），但总算有惊无险，顺利完成拍摄。🤠新设计唔只比较干净俐落，而且仲方便拍摄呢！今次叫咗我以往食开嘅大生肠，细生肠及猪膶，承惠$35。我点嘅时候，要求要少芥辣嘅，但唔知个事头婆新抱（肥姐个新抱，我点知系佢？咁出名嘅名店，肥姐同佢新抱又点会无接受大大小小传媒嘅访问呀？接受得传媒访问，又点少得出埋佢哋个样呢？）唔知系听错定唔记得，临畀我之前，仲唧多少少芥辣上去，变成依家咁。😠大生肠同细生肠，同样保持到水准，爽口无胛味，但大生肠嘅厚度比以前食开嘅好似薄咗，抑或我已经食到唔记得第一次食大生肠嘅味道？今次体验最大问题出现起猪膶度，以往食嘅猪膶，熟得嚟软身，咬落好香，超好食（呢个味道我肯定无记错），但呢次食落就有啲硬，应该系煮得过熟，唔知会唔会同肥姐放手畀佢新抱主理，功夫未到家有关？我谂我下次都会试多次，睇吓佢哋系一时失手，抑或都仲系咁嘅口感，系依家嘅口感的话，会转其他嘢，唔再食猪膶。至于生肠，因为系我至爱之一（大细都系，尤其是大生肠），唔会转啦！