Opa Mediterranean Bar and Bistro (已結業)

未试过地中海菜，经过就去试下。 餐厅环境都几relax，灯光柔和，今日天气唔太热好chill；下午茶时间无午餐，只可以散叫试下不同野食。两个人叫左总共四样嘢。头盘叫左一个地中海茄子泥配皮塔包，同埋一个炸鱿鱼。炸鱿鱼同平时街边港式个啲简直系两回事。炸皮超薄，鱿鱼肉又超大块又厚切，食落唔韧之余更加称得上系juicy，唔错。茄子泥配包另一边厢就好清新，解左炸鱿鱼嘅油腻，食落质地虽然似bb食物但反而有种comfort food易入口嘅感觉，叫得几好。主菜叫左个经典pizza，另外见其他枱个个都叫咗串烧，所以我哋都叫咗一串海鲜串烧。经典pizza系鸡肉配上菇同芝士，中规中矩咁啦。值得一题系个海鲜串烧，一上枱果下𠮶串野真系好吸晴，有虾，吞拿鱼同三文鱼各一，鱼烧过之后唔会㶶，入面都好嫩滑，配上烧烤酱同鸡尾酒酱，味道都几衬。四样嘢虽然睇落份量唔大，但食落都几饱肚，黎既朋友又注意下！