洪師父牛肉麵 (已結業)

疫情下都好少出街食饭，星期六放咗工，真系唔想咁早返屋企，成日都经过洪师傅，见当时舖内客人又唔多，所以就入去试试佢。我就叫咗川味牛肉面，汤清得嚟充满牛香，肉方面系用牛肋条，食落弹牙唔靭，牛油香十足，面质烟靭弹牙，汤浸耐咗都唔会糊同烂。川味方面目测有啲啲辣油，不过川味一啲都唔突出。碗面嚟嘅时候好似唔太大碗，不过食落材料十足，相当够饱。大佬就叫咗卤肉饭盐酥鸡、卤肉唔系肉碎级，而系好细嘅肉粒，肥膏同肉比例适中，配上香浓酱汁，送饭真系一流。饭面仲有菜脯、腌菜丝、腌萝卜同卤水蛋，净系碗饭都够饱。盐酥鸡唔系一粒粒，而系盐酥鸡扒，一件件，咸香脆，唔会炸到干争争，肉汁充裕。跟餐嘅阿萨姆红茶，菜清新幽香，已经叫咗少甜都略嫌甜咗啲。少甜少奶嘅珍珠奶茶，就一般货色，茶味都算香。两杯饮品都好大杯。环境都坐得好舒服，我哋坐近厨房出菜位，望到厨房里面都好干净整齐，令人喺咁嘅疫情环境下都食得安心。