鍋卷鳴門 (已結業)

生日月，朋友同我嚟一个疯狂海鲜夜！喺门口已经睇到自助区活海鲜嘅是日精选，竟然有赖尿虾，好耐冇食过，有期望呀！放题有三个级别，汤底亦都有唔少选择，想加钱食个清酒煮蚬汤，可惜今日冇，如果唔系用嚟煮海鲜应该好正！场内环境几大，我哋两个人就已经有一张大枱，可以放到好多嘢食。唔理咁多，即刻出去夹海鲜先！夹海鲜个筒比较细，一次夹唔到好多，如果大返啲就好喇。出到去个鱼缸有好多新鲜嘅海鲜，只只生猛，拣啱边只就即刻夹起佢，再放入冰筒冰晕佢先。见每枱食客都好努力咁食海鲜，而我全晚都系去夹、渌、剪、拆、食，不停loop，好忙碌。 赖尿虾咁大只，肉质比较腍同鲜味！仲有九节虾，肉质结实、爽弹，而且每个虾头都有虾膏，滋味无穷；大连鲍鱼唔使渌咁耐，咁就会有嫩滑口感，第一次无限食鲍鱼，点可以唔食多几只呢，正！另外我好钟意日式酱油虾，系需时制造，上台𠮶阵时热辣辣，香味四溢。酱油味渗晒入只虾入面，咸香有特色。虽然美国牛小排同埋澳洲牛板键都好好食，不过今日佢唔系主角，我只系食咗每样各一。饮品有支装汽水、咖啡、朱古力、美禄、蜜桃茶、金橘蜂蜜绿茶⋯⋯最后要食埋甜品。吃喝玩乐嘅一晚，疯狂又开心！