俺流塩らーめん (新都會廣場)

营业中

休息中

寻日去咗迪迪尼玩，睇完夜间巡游返出嚟揾嘢食，醒起个 friend 提过呢间拉面好味道，即刻上 openrice 𥄫吓咩料先，点知见到好多负皮，又话啲面太淋又话汤底唔得仲要服务差㖭⋯ 本来有啲却步，但一时间又谂唔到附近有乜笋嘢，见佢近近哋即刻飞车过去。大约八点零九点到，已经唔驶排队，差唔多行到门口时有个笑容可掬嘅女孩子出嚟打招呼同埋带我哋入座，跟著另外一个男仔放低水、餐牌同用心介绍唔同汤底，及后逐一上菜，成个过程服务不知几好，员工有礼貌有笑容有水准，无出现过寒冰西面，好过出面好多食肆。我哋叫咗黑蒜油熟成浓汤拉面、淹流柚子塩汤拉面、豆腐野菜沙律、玉子大阪烧同埋唐扬炸鸡。个黑蒜油熟成浓汤拉面一上枱，见到掺和咗黑蒜油嘅乳白色汤底带著油润光泽就已经觉得对板，咪讲笑即刻试啖汤先，喂得㖞～ 入口阵阵香浓而不黏嘴，又够热辣辣。再𠽌返拄面，咦都唔错吖，爽滑弹牙又挂汤。试咗原味就系时候加入我追加咗嘅青葱同白葱喇，一二三车晒落去之后有稍微降低咗碗面嘅温度，但可为汤底提香之余亦令面条口感更为复杂。𩠌方面有一块叉烧，食落普通啦无乜惊喜；另外玉子原只上，咬开都算流心有啲蛋香，但原来无调味嘅，我自己比较钟意味付蛋。