閨•家 (西九龍中心) (已結業)

喺深水埗西九龙中心呢个舖位，最近转咗手开咗呢间闺·家，打正旗号话系无味精茶餐厅，听个名都知道佢主打家的味道，今日又约埋个同事嚟试吓。虽然佢话自己系茶餐厅，但餐牌系一本用硬皮制成嘅多页餐牌，图文并茂，印刷精美，感觉比起茶餐厅嘅档次高一点。讲到冇味精，首先一定会谂起冇味精靓汤，呢度一星期七日会提供七款唔同嘅汤水，并且会随饭餐附送细盅靓汤。嚟到当日系星期三，系海底椰栗子煲猪展，海底椰有润肺功效，真系抗疫之选！第一次嚟食，就拣个人气推介嘅香煎莲藕饼猪扒饭，莲藕饼爽口，猪扒属于薄身猪扒，不过都几大块，我仲加咗$6有半只溏心蛋，味道唔错。同事钟意食辣，所以叫咗麻辣口水鸡配紫薯面。口水鸡辣度适中，紫薯面颜色好靓，微微带紫薯香味，汤底甜甜哋，面嘅份量多，个人觉得几抵食！另外叫咗香茅鸡翼，香茅味唔重，反而配搭雪菜又几新颖。自小去食上海菜已经钟意炸馒头，估唔到呢度都有得食，馒头炸得干身唔油腻，系令人怀念的味道！呢间闺家价钱亲民，又有无味精靓汤，所以午市时间都要等吓位，希望呢份家的感觉可以延续落去啦！