影片
更多
2014-04-29
3956 浏览
以前老一辈啲人，都钟意晌米缸贴张红纸「常满」，唔使多解释都明，信相依家后生嘅都无乜边几个会咁做。如果有得拣「常满」，我就较喜欢「知足」常满嘞，正所谓知足常乐，如果经常对咩事都咁知足，毋须事事比较，心灵都会轻省好多。今晚，约番几个之前一齐去大马旅行嘅朋友，聚聚兼吹水，就番大家中间位，选址「常满鸡煲」，因为知足，唔需要「常满」（撑得饱饱），最紧要「尝满」（食得满意） ！荃湾区都算小弟出入较多嘅区域，所以，都知道众安街、二陂坊、三陂坊开咗唔少鸡煲专卖店，好几间仲人龙不绝，不过，是夜目标唔喺鸡煲㖞，而喺另类火锅，一向钟意试新嘢，当然想食得有特色啲啦 。室内装修唔太花巧，水泥墙、木枱木櫈，简约得嚟又带番少少地踎味道，唯一特色就喺啲雀笼吊粒。有卡位，有圆枱，亦有6-8人嘅大长枱，感觉卡位最舒服，因为较为阔落 。主餐牌方面，A4纸底面两版睇晒，一面喺汤底、小菜及牛肉火锅配料，另面喺蔬菜、海鲜、丸饺、猪肉……等等火锅配料。此外，仲有几个细餐牌，包括冷盘、小食及饮品，因为唔喺任食，所以打算等齐人先开炉，又为免饿亲朋友，先试个小食，食住等。 清酒煮翡翠螺 $68 个翡翠螺加咗少少木鱼碎，所以，
荃湾区都算小弟出入较多嘅区域，所以，都知道众安街、二陂坊、三陂坊开咗唔少鸡煲专卖店，好几间仲人龙不绝，不过，是夜目标唔喺鸡煲㖞，而喺另类火锅，一向钟意试新嘢，当然想食得有特色啲啦 。室内装修唔太花巧，水泥墙、木枱木櫈，简约得嚟又带番少少地踎味道，唯一特色就喺啲雀笼吊粒。有卡位，有圆枱，亦有6-8人嘅大长枱，感觉卡位最舒服，因为较为阔落 。
主餐牌方面，A4纸底面两版睇晒，一面喺汤底、小菜及牛肉火锅配料，另面喺蔬菜、海鲜、丸饺、猪肉……等等火锅配料。
此外，仲有几个细餐牌，包括冷盘、小食及饮品，因为唔喺任食，所以打算等齐人先开炉，又为免饿亲朋友，先试个小食，食住等。
清酒煮翡翠螺 $68 个翡翠螺加咗少少木鱼碎，所以，送到嚟见啲木鱼碎郁郁吓，就好似呼唤紧迟到嘅人快啲嚟。一客翡翠螺有8粒，除番开都算抵食㖞，而且，啲螺有淡香清酒味，唔呛喉，螺肉都几爽甜，试得过。如果喜欢食大葱嘅朋友，不愁寂寞，内里都有唔少添。
招牌鲜人参药膳锅 $128 哗，好大锅呀？但估唔到喺奶白色，不过，一饮就知点解，原来加咗腐竹，好香豆味。捞一捞，亦发觉有唔少药材，但啲名就唔喺太识，不过亮点就喺条原条鲜人参喇。此外，仲有啲豆腐、猪红……等等，味道甜甜哋，较浓豆香味，药材味反而唔犀利，所以怕药味嘅人食依个锅都应该无问题。
打鞭炉唔停咁滚，扯干水就必定架喇，但店方有个几好嘅安排，成渣清汤放晌枱边，有需要自斟，唔使吓吓等人嚟，都几方便 。题外笑话，有个朋友嚟到，问咁快叫咗渣咩嘢饮，咁嘅色嘅，雪梨茶呀？唔使讲都知我哋点答佢啦 。
跟住，就讲讲火锅料嘅质素，今晚大家状态唔差，都算喺试咗唔少嘢，即刻去片同大家分享。鲜炸响铃卷 $38（全份） / $22（半份）
响铃做得颇大条，店员话喺师傅即做鲜炸，所以，专灯试一条就咁食，入口微热，脆得交关，不过就会味淡啲；再试一条汤灼，轻轻一拖，响铃吸咗少少汤汁，食落有点豆香，喂！真喺唔错㖞 。
韮菜饺（左）．瑶柱白菜饺（右）$38饺类单点$30 / $35，双拼就$38，多选择又几特别，而且又标榜自家制。望落外皮又真喺睇得出喺自家制，仍有点湿润，唔会雪死过咁「干争争」。味道以韮菜饺突出啲，因为一啖食落满满韮菜香，而瑶柱白菜饺都食得少少瑶柱丝，算喺无欺场，外皮薄薄，但有啲黏牙 。
一级桂花蚌 $98 食海鲜最重要喺能品尝到其鲜甜味，估唔到桂花蚌跟依款汤底几夹，灼过嘅蚌肉集鲜、甜、爽一身，若果食重口味嘅鸡煲或麻辣汤锅，应该口感有余，鲜味有所掩盖。
手打鲜墨鱼滑．手打鲜虾滑 $73 如果散点每款要$68，不如加多$5要双拼。两者都做得有水准，鱼滑打得爽弹，入口鲜甜，无论墨鱼滑定虾滑，其本身嘅味道都突出，甚有货真价实嘅感觉 。
沙巴龙趸肉 $108 龙趸鱼片外观有光泽，新鲜度不成问题，灼过嘅龙趸肉，鱼肉好滑，不过，因为边位仲带有少少鱼皮，而鱼皮入口韧净，觉得去埋皮口感仲好。
常满六合丸 $78 丸类标明自家手打，部份甚有特色，如黑椒象拔牛肉、手打黄金墨鱼丸…，又喺店长推介，都令人几想试，不过，店员推介咗另一招牌丸「常满六合丸」，话喺由甘笋粒、鲜虾肉、象拔蚌、莲藕粒、蟹籽、墨鱼打成，又真喺几有吸引力。老实讲，小弟就难以食出每样材料味道，但口感就绝对有层次，弹牙中有嚟自笋粒同莲藕粒嘅爽口感，亦有啲嚟自蟹籽同象拔蚌嘅咬口，实在又几有特色 。
极品手切肥牛 $298 虽然朋友唔喺食肉兽，但打鞭炉如果无肥牛又总喺若有所失，加上佢哋对食都有少少要求，所以，极品手切肥牛应该合佢哋心水。牛肉色泽红润亮丽，油脂唔太多，但分布平均，师傅手势好切得够薄。轻轻一灼，好嫩好滑，肉味十足，可谓质味兼优，正 ！有时有啲嘢，真喺一分钱一分货。
梅酒千层肉 $78 依道喺全晚我哋大家一致选为嘅惊喜菜，五花腩切成薄片卷起，再浸话梅花雕酒。虽然啲腩片睇落确实几肥，不过，入口感觉好唔同，话梅味非常突出，好入味，所以油腻感近乎全消，而酒味则淡淡散发，有种余韵嘅感觉 。
杂菜篮 $32蔬菜类由$20-$38，唔想烦食乜，杂菜篮就简单一啲，两、三样菜插满一大碗，随随意意。
津路乌龙茶 $15顺便讲讲饮品，啤酒类别都有几多款，仲要嚟自唔同国家，不过，我哋当中无人好啤酒，所以都喺饮番啲大路嘢。朋友贪得意，拣杯冻柠茶，柠茶喺店内自家冲，唔喺现成货，不过，都喺一般般；小弟就要樽乌龙茶，解解腻吖嘛！
讲起队酒，相信猫头鹰时段，有唔少客人晌度食鸡煲，队啤酒，饮大咗而呕吐之事时有发生，故此，见到店方都作出温馨提示：「如在店铺内或厕所呕吐，一律收取HK$300清洁费 。」实际到头嚟执唔执行就唔知，不过，真喺为免影响他人，大家都确要敬请自重 。
虽然周围好多枱都有食鸡煲，但我哋食完又唔觉有话沾满一身味，一来店内楼底高，二来室内通风系统唔错。整体嚟讲，食材用料不赖，当中又不乏特色，配合埋殷勤服务，令是夜重聚日大家食得称心满意 。
题外话/补充资料：
Citibank有9折优惠
(以上食记乃用户个人意见 , 并不代表OpenRice之观点。)
张贴
