金子半之助 (新都會廣場) (已結業)

本店位于日本桥既过江龙金子半之助香港开铺都有几年，刚刚开业时都试过几次唔错，今日再黎睇下水准有无变到。餐厅同其他天丼饭餐厅既唔同就系呢到采用日本特制高级胡麻油去炸天妇罗，用胡麻油制成的天妇罗芳香扑鼻及色泽会较深，麻油既香气街外都闻到。餐厅人潮无以往刚开业时咁墟冚，坐得比旧时舒服，而且人潮小左，餐厅无咁嘈，可以静静的品尝食物。当日嗌左松叶蟹天丼、江戸前天丼及迷你天丼拼稻庭乌冬。松叶蟹天丼，冬季系食松叶蟹既季节，一碗内有两只蟹脚、海老、小柱鱿鱼天妇罗、荚碗豆、海苔及温泉蛋，配料份量都几多，每啖饭都可以有配料去送。蟹脚都算大只，咬落肉质爽弹，鲜甜但可惜蟹味唔算好浓；海老肉质都爽弹，唔会过老；最欣赏既系小柱鱿鱼天妇罗，即系以元贝仔及鱿鱼炸成既天妇罗饼，食落有油香而且啖啖肉，十分鲜味。江戸前天丼，与松叶蟹天丼配料一样但蟹脚就换上星馒天妇罗，星馒足足有30CM长，食落肥美厚肉而嫩滑，食完好满足。稻庭乌冬以酱油汤做底，上菜时店员会送上成个药箱咁大既配料盒上枱，盒内有木鱼花、昆布、葱花、天妇罗碎及温泉蛋，方便食客自己添加不同配料。配上迷你天丼食，又饱肚又可以试多样食物，岩哂D心大心细谂唔到食咩的朋友。