Bistro Lobby (已結業)

星期六下午又同老婆找地方食饭，经过门口觉得几吸引，坐低试下!入到店内方知系夫妻档经营，负责招呼嘅女店主先问想要暖水定冻水，够细心，一赞。因为系星期六嘅关系，只有a la carte 嘅 menu。但有3款好似set咁，老婆要咗c款，系鸡扒饭。我就要咗个系餐牌上嘅蕃茄酱海鲜Linguine($52)，另外老婆要咗个焦糖炖蛋，我就要咗个咖啡。太太嘅鸡扒饭我试咗d鸡扒，味道比较普通，唔系咁突出。而我嘅Linguine要稍等一阵，不过味道真系几得，茄酱味道唔太酸而有番茄香味，同面加埋d茄酱好食，而且份量颇多，我食量唔细都够饱。另外海鲜有虾、青口、带子、墨鱼仔同鱼。先食d 鱼，鱼唔系大厚身，但保持到嫩滑而有鱼味，比出面一般嘅鱼柳厚身但冇乜味而又"鞋"好食得多，而墨鱼仔、带子同虾都好好味，唯一比较失色嘅系青口，青口系带壳，size较细，但问题系太咸，系成个菜比较差嘅一个环节。但总体可以食得出厨师嘅心机。个炖蛋我冇试，但老婆话系冻嘅，见佢食得几滋味，味道应该几好。我杯咖啡水准都几好。呢到嘅价钱几抵，只系比快餐店高一d，但食品味道高出几班，可见店主真系想做d好嘅食物，并非只系以赚钱为目标，值得支持。