陸號

营业中

休息中

其实睇𠮶间餐厅厨房得唔得？你试吓星洲米就知道。呢间喺乐富开咗唔系好耐，之前只系得隔篱𠮶间茶餐厅，新开就梗系试吓啦。一直我哋只系食佢嘅早餐，都系正正常常；基本上如果你要饮水或者洗餐具都系自己去吧枱度斟杯水搞掂。今日晏咗起身，我就自己去食午餐，叫咗个星洲炒米，冻奶茶少甜多奶。自己去斟杯水谂住洗筷子啦。斟咗杯水埋位就发觉唔对路啦，个杯里便仲有黏住啲橙色嘅油；水面就浮咗好多油花！心谂之前都唔系咁污糟个㖞，于是乎过咗一阵我就叫咗个侍应嚟望一望杯水。咁佢都即刻收走咗杯水，亦都冇补返一杯俾我。（其实都唔紧要嘅洗筷子啫。）跟住大概过咗15分钟左右𠮶碟星洲米就出咗嚟。用幼嘅米粉去炒，面头系米粉底下先至系配料。卖相只不过系中规中矩（见图），但系味道就好鬼咸！结果因为实在太咸我系冇食晒。。。星洲炒米加杯冻奶茶要$66 谂住星期六悠悠闲闲食个lunch冇谂过系咁样，$66值唔值得真系见仁见智啦。中途见有唔少人催单，亦都唔见佢有多客人等位嘅情况；咁嘅环境唔知道佢又可以撑得几耐。