雲家小鍋米線 (安寧大廈)

营业中

休息中

外卖咗碗云家米线同几个𩠌，真系抵到烂，份量巨大，招牌云家米线大碗到可以两三个人分黎食。两个大碗装满，米线汤底分开放。汤底今次要唔辣，但都好浓味，有好多酸菜同料，味道有深度又唔算油腻。米线幼身爽弹又挂汤，好正。重点系面同𩠌嘅比例一比一，真系好多𩠌！配料包括：大大量腐竹、鸡丝、螺旋草、芽菜、酸菜、韮菜、葱、芫茜，仲有入味炆冬菇、卤水鸡翼、弹牙鱼春卷、香煎肠仔！净系食𩠌都饱。仲手多多加咗$11 腩肉，真系大方到癫咗，加几蚊俾成十块，仲要块块厚肉入味，食肉兽唔好错过。难得做外卖仔，当然要加几个招牌小食，凉拌墨鱼头爽口新，而且处理得好又唔韧，生剁蒜加秘制辣油捞匀，好惹味。秘制猪颈肉，大大片，多汁，肉味腌得恰到好处，烧得香，有配泰式甜辣酱，非常高质素，屋企人大赞。酱拌皮蛋，个人最爱！个酱调得超级好食，有混合剁蒜、酱油同埋少少辣汁，用上黄金皮蛋，味道比黑色皮蛋更温和，更配合特调酱汁，差啲成兜俾我食晒。