Mr Poggy

营业中

休息中

行开呢边买外卖，等紧期间见有新店开左叫Mr Poggy，攞张外卖纸返去研究下先。都几多野拣㖞，汉堡包，pizza，意粉，沙律，小食等，仲有套餐添。揾日就黎左叫外卖，即整都唔算等好耐，十几分钟就有得拎了。佢门口有几张枱仔可以立食，天气唔算好热，衬新鲜食下啲炸野先，外卖返到去就会失色不少。主食拣左经典芝士汉堡，原来仲跟埋沙律菜，咁又几好，有菜有肉感觉健康啲。个汉堡睇落平平无奇，食落又意外地juicy㖞，汉堡肉重肉味，软绵绵嘅面包，仲好重芝士味添，呢个厚度刚刚好可以一口咬落，好味好味～另外仲叫左烧羊肉配薯条，羊肉用烤的，好香口呢，口感唔错啊！羊肉同薯条份量都超多，一盒满哂㗎，share食就啱啦。其他有炸洋葱圈同炸鸡块，啱啱炸起唔会唔好食啦，呵呵～洋葱圈劲抵呀，廿几蚊有咁多，哗～自己买都唔平嘛。鸡块又系抵食，用味道近老麦的鸡块，唔系平价个只又粉又淋，正！最后仲要赞下啲酱汁，店家比左黄色嘅蜜糖芥末酱，白色嘅蒜味沙律酱，仲有个红色嘅辣酱，三种都好好味，个人钟意红白酱两沟，哈哈，辣辣地又酸酸地咁，再带埋蒜香劲好味。食咁多野再加罐冰冻汽水，一乐也。