財記美食 (已結業)

有一日喺YouTube上面睇到有个频道介绍亚洲美食，其中一间就系观塘嘅财记美食，见到超有火喉嘅小炒，再加上又近自己，就揾埋屋企人去食返个晚餐，做好安心出行同埋量体温就安排入座！椒盐鲜鱿，鱿鱼新鲜唔霉，面粉底唔厚，除咗脆口之外，鱿鱼嘅味道更加突出。仲有除咗有炸蒜之外，仲会有啲辣椒碎，辣味令到道菜更惹味，我哋都更加开胃！豉椒炒蚬，好大碟，真系好大碟！蚬既量多，蚬肉都好鲜甜，豉椒味道够。所有蚬受热都好平均，全部都开晒壳，而且冇沙冇泥，洗得好干净！西兰花蜜椒腰果牛柳粒，腰果即炒好脆口，牛柳粒有些少烟韧但牛味够重，最突出嘅系个蜜淑汁，蜜糖味浓，配埋甜椒做出嚟嘅汁酱同牛柳粒不谋而合，放底嘅西兰花都吸晒所有味道既精华！菜远斑腩炒面，斑腩量多又大旧，咬落口啖啖肉。而最重要就系个面底，面底煎得够香脆，多余嘅油份都分隔咗出嚟，唔会令到碟底充满油份，再者茨汁嘅份量都啱啱好，唔会令到个煎面底咁快变冧！