秋田浜燒食堂

营业中

休息中

黎到佐敦一间日式餐厅，地理位置就虽然系唔太方便，但系咁辛苦嚟到呢度食到超值嘅套餐就绝对值得！一个价值1088嘅「小樽渔港」套餐，包含嘅嘢绝对系会令人满载而归。重头戏未嚟之前就梗系要食沙律开一开胃先。再黎就系渍物，虽然份量细细但系好满足。有个小游戏，一只手拎到几多只虾就可以食到几多只，我只手就唔大，抓到4只都算系唔错啦。虾既鲜甜可以过一过口瘾。生蚝系我最爱，今日食到岩手县既岩蚝，见到个大小就已经被吓亲。咁大只蚝比较少食到，满足晒。食完生蚝职员就帮我哋烧鲍鱼同埋带子，个带子嘅汤汁真系一流，直头要索晒啲汤汁。蟹膏甲罗烧都系一见到就必点嘅嘢，咸香鲜甜，配上蒜蓉包系好夹嘅组合。配有蟹肉明太子既蛋黄酱乌冬俾人感觉好新鲜，酱料十足，乌冬唔会干身。朋友叫嘅迷你海鲜丼份量话大唔大话细唔细，最紧要都系食得饱。其实系食主食乌冬嘅时候都已经饱饱地，食完之后再上一个精致嘅甜品，红豆奶冻质感绵滑，真系完美收尾。