屯の大阪章魚燒 (已結業)

喺同事嘅介绍之下揾到黎呢间极度隐世嘅章鱼小丸子铺头 ，难揾程度绝对可以称得上我食过嘅舖头入面既三甲。呢间嘢除咗隐世之外，排队排一头半个钟亦都系好出名嘅，估唔到最憎排队嘅我，今日都屈服喺佢嘅淫威之下。舖头净系卖章鱼小丸子，口味有五六种，横惦黎得等，除咗已经卖哂𠮶啲口味之外，梗系要试哂啦。原味大阪风，材料同出面食到嘅差唔多，不过外皮脆好多，同旧鱿鱼大粒同新鲜好多啰。激多葱风味就由于系激多葱嘅关系，有少少京川沪嘅感觉。超爆多蟹仔果然系爆多蟹子啊吓，啲蟹子多到有啲咸得滞添，另外一提喺等食期间见到女店员将兜蟹子打泻左落地，虽然好彩只系个匙羹跌咗出嚟，但系佢竟然将跌咗落地嘅匙羹再次塞返落堆蟹子𠮶度，三岁小朋友嘅卫生意识，濑地下啦。辛口明太子酱，个人觉得呢个最好食，个酱甜甜地，不过就完全冇话辛口，叫做有少少特别咁啰。系就系好食过其他舖头嘅，不过要等成半粒钟都系咪搞我啦。