拉麵天王

营业中

休息中

舖头细细，有大概20个位，得一个拉面师傅同埋侍应。餐牌得四种，白、黑、赤、限定天王，可以拣汤底口味同香油浓淡、面质软硬、要唔要葱同叉烧。白天王 $75猪骨汤汤底，口味香油都系拣普通，闻落猪骨香味淡，色泽亦偏淡，有薄薄一层油系汤面头，但饮落系浓而不腻嘅猪骨汤，猪骨胶质唔多，唔会太过重口味同埋张口。面底份量足够，男仔可以未够饱啦，面条幼身有韧度，面质拣咗普通，挂汤能力正常，食起嚟食到猪骨汤又唔会太浓。叉烧有两片，唔系平时卷起嘅の形叉烧，系单纯一片片，叉烧半肥半瘦，瘦肉肉质有少少干，连肥肉一齐食油脂感重，亦差啲叉烧应有嘅焦香味。配料紫菜腍咗；非常罕见嘅椰菜，脆又甜但冇猪骨汤味；半只味蛋，蛋黄过熟，而且蛋外层冇酱油味。同场加映黑天王，黑蒜猪骨汤，无论系香气定味道都好淡，唔建议黑天王。