彩福欣宴 (已結業)

师傅前前后后都黎左呢食店几次, 但点解都仲未有食评呢? 皆因师傅次次都谂住映埋相先写, 可惜次次都挂住食所以唔记得左, 而今次都系冇映, 不过著实想分享下, 所以希望能够净系用文字都可以引起大家嘅共鸣啦!是晚一行四人就黎左呢间食店度食晚饭, 全程由师傅发板, 于是乎三𩠌一汤又点少得, 问一问个伙计有咩正汤? 于是就介绍左龙利叶木瓜煲鸡脚汤, 再柯打左呢度颇出名嘅盐焗鸡一只, 鱼肉酿茄子, 金银蛋浸豆苗, 再加多一碟生炒糯米饭!先讲下个龙利叶木瓜煲鸡脚汤, 汤底煲得好够火喉, 味道清甜, 够晒滋润, 系咸左少少同埋带少少肥啦, 如果再淡少少就仲正, 一煲汤分到六碗, 所以绝对够饮; 盐焗鸡系一个砂煲上, 皮香脆肉身滑, 一d都唔韧, 加上味道唔会过咸, 啱晒师傅呢d钟意食滑鸡嘅人, 正呀!鱼肉酿茄子卖相比较特别, 系两只茄子成条上, 面头酿上鱼肉, 而碟边伴上西兰花, 上枱后伙计先帮手剪开, 茄子酿得几腍, 而鱼肉亦唔算多骨, 个汁亦十分好味, 至于伴碟嘅西兰花亦系一绝, 西兰花爽口得黎又唔硬, 加上非常嫩绿, 十分好味; 最后金银蛋浸豆苗亦不赖, 豆苗新鲜兼嫩绿, 一d都唔老, 劲正!