瑞士咖啡室 (已結業)

呢间餐厅似乎系试业阶段，所以部分招牌仲系用红纸遮住，餐厅装修有一半系典雅，一半就保留返传统茶餐厅嘅风格，装修风格见仁见智，但我觉得有啲不伦不类。嚟到想坐卡位，我见张梳化有好多食物碎👎，枱面好污糟，我又留意到周围啲枱底有好多食物碎👎，应该系啲客留低，但侍应都无将佢清理，新餐厅嚟讲，卫生唔能够接受，侍应服务可以用"爱理不理"去形容👎，新开餐厅，点都要加多两钱殷勤！肉丝炒面份量唔多，卖相差👎，面唔够脆，肉丝同埋冬菇淡而无味👎👎，好似浆糊咁，零分。瑞士汁炒牛河虽然系呢度嘅招牌，但卖相好差，望落去干争争，好处系唔会太油腻，牛肉无乜牛肉味，成个瑞士汁炒牛河只算系普通嘅干炒牛河，因为瑞士汁炒牛河应该系比较湿润，同埋豉油甜味较重，招牌都失败！👎奶茶上枱前侍应已将我杯奶茶倒泻到成个碟都系👎👎，真系太唔小心，佢放低转头就走，无谂住抹番好佢！！👎👎，奶茶味道方面，茶煲得过火喇，有涩味，而且奶味太重，成杯奶茶嘅平衡错晒，同华星冰室和太兴嘅奶茶相差好远，零分。总括一句，呢度装修个人认为不伦不类，服务十分差，卫生好差，食物卖相差，食物味道差，奶茶差，希望佢地努力改善，对不起，今次只能够俾劣评。