二宜樓 (已結業)

我讲嘅系屯门海翠坊嘅二宜楼～潮州客家菜。喺海翠坊开业嘅食肆，终于试匀晒啦，呢间最迟开业，而我到而家先有机会帮趁。今日系星期五，有下午茶供应﹙星期六日欠奉﹚，大中小点一律7.80，认真底食，我地都系净叫点心。有花生鸡脚﹑墨鱼卷﹑芋蓉粿﹑春菜饺﹑同埋流沙饱。除咗流沙饱，其他都系潮式点心。要讲嘅系：墨鱼卷～蒸嘅，卖相简单得嚟又几受落，一碟四件，好多墨鱼粒在内，清淡好食，又有赵头。芋蓉粿～煎嘅糯米糍，少少甜，不过要趁热食，冻咗就烟韧Ｄ。春菜饺～春菜系潮州特产，不过所食倒嘅唔似以前食过果种，但系都几清爽，配以虾仁，清清地，可惜外皮扫得太多油，扣咗分。流沙饱～最流沙的一次，食果阵都己经好小心，但系都唧到碗碟都系晒，好彩冇沾污件衫，好失礼。因为试过《潮楼》一役，唔敢抱太大期望，点知呢间冇打正潮菜招牌，反而食倒潮﹑客和广东点心，所以呢餐都好满意，加上呢度装修几特别，以圆型来设计，外围二人枱及卡位，灯光柔和，似餐厅或日式餐厅，中间系多人枱，较为光猛，适合一家大细。服务效律唔错，可惜我地一连几张枱头顶都耐唔中有水滴落嚟，可能系冷气喉嘅问题，领导人真系要跟跟啦。