Chatterbox Café (K11 Musea)

营业中

休息中

三年前去新加坡旅行嘅时候，就拣咗住喺文华东方酒店，点知日日玩到醉生梦死，饮饱食醉先返酒店，所以根本都冇机会试吓酒店最出名嘅海南鸡饭。难得佢喺香港开业，今日终于的起心肝约咗个friend嚟试吓佢嘅海南鸡饭，一雪前耻。餐牌制作精美，有啲仲图文并茂。首先叫咗啲小食，新加坡近年最兴乜嘢都加咸蛋，什么咸蛋鱼皮、咸蛋薯片都大受欢迎，嚟到呢度见到有咸蛋菜式，就试吓呢个咸蛋鸡翼。六只咸蛋鸡全翼承惠$78，咸蛋分布平均，啖啖充满咸蛋香味。呢度嘅串烧沙嗲只有鸡肉，鸡肉非常鲜嫩，仲搽咗蜜糖，甜甜地几好味。跟住就轮到主角海南鸡饭出场，套餐配咗汤、油饭、同埋三款特色酱料，包括有姜蓉、辣椒酱同埋黑豉油。鸡肉嫩滑，油饭带有鸡油香。最后仲食咗甜品，拣咗个带有港式风味嘅红豆凉粉刨冰，雪糕系云呢拿味，食完透心凉。虽然味道唔错，但我仍然渴望可以搭飞机飞去新加坡，试吓正宗嘅海南鸡饭，同埋享受真正五星级酒店嘅服务。