博多拉麵別天神 (已結業)

好耐无食过拉面啦！之前北角都有一间博多拉面别天神，但最近执咗，为咗重拾佢嘅味道，我决定去佢嘅另一分店：铜锣湾告士打道铺。但系，一去到门口就打咗个突，因为店面俾我想像中细劲多，如果要走到店铺最入嘅座位，就算再瘦嘅人都要「缩起个肚、举高个袋」先可以入到(出嚟𠮶阵挺住个满载而归嘅肚，难度应该再高啲)......食个拉面姐，都要过五关斩六将咁......我嗌咗一客虾味噌套餐，配日式饺子。拉面嚟讲，汤底一如既往嘅好味，浓郁得嚟又唔会过咸；叉烧软嫩，溏心蛋入口即溶，配菜又恰如其分地吊到味，唔会喧宾夺主；最特别系放喺中间嘅樱花虾，鲜艳夺目，为呢碗拉面加唔少卖相分！至于日式饺子就相对普通，我嫌佢淋得济，只可以用不过不失嚟形容。服务方面，店内只有一男一女店员，见佢地全程都默默做无停手，对客人态度良好，既勤快又有礼，值得一赞！整体嚟讲，除却店内环境过于狭窄之外，食物质素同服务都好好，值得一试(再试)！