北河燒臘飯店 (已結業)

一年先到一两次既自己，讲唔上系熟客，但对敝店既善行早已知悉，呢度唔多讲。间野好地踎，一系唔好入黎，入得黎就唔好投诉，我呢d为左食野通山跑既人，当然冇问题。凉瓜排骨饭唔算好大碟，但正常食量一定够饱，凉瓜切细条入口够甘我钟意，排骨调味正常亦冇松肉粉攻击过既痕迹，芡汁唔会杰过龙可以gel头，而食平饭自己最惊既糊仔饭都冇出现，米粒分明。奶茶冇期望所以冇失望，至少唔系难饮个只。后加既烧卖只卖十三大洋，粒粒饱满，如果你食惯左街边既十蚊几粒既橡胶烧卖，强烈建议俾多三鸡试下呢度，见识下真正烧卖既威力。不过抵还抵，个人口味觉得调味甜左d，咁我话晒都系客，弹两句都得卦。一个凉瓜排骨饭加饮品先三十大元，叫埋烧卖都系四十有三，味道重系冇问题，抵到难以相信。俾人加租加到打算收皮，好心人合理租金帮忙，一刻个脑谂到绝处逢生四个字。冇旧业主既加租，唔会有今日既平租兼大左既新舖，天无绝人之路，好心有好报。新舖系正对面，四月头先交舖，应该冇咁快有得食，有心人可留意下传媒消息。