Fass (已結業)

Item: Fass
Rating: 4
Author: 奥志雷

3.5

55 食记

味道

环境

服务

卫生

抵食

770

尖沙咀

$101-200

德国菜西餐厅酒吧

奥志雷

等级4

2.1K

再次系我第一个到，最初去左地面既 Biergarden bar，原来餐厅系要落 basement 架，酒吧先系地舖。地牢德国餐厅，即时令我谂起以前系德国既时候，去由二次大战防空洞改建而成既德国餐厅食饭，十分相似，好有 feel 呢。内笼装修都非常德国风，不过圣诞装饰就有点娘啊。

本来环境舒服宁静又浪漫，不幸地有台操北方语言既女人连几个细路嘈到拆天、喧哗乱叫、高谈宽论、鬼杀咁嘈，当左自己屋企咩 ﹗真系大杀风景，将和谐既气氛完全破坏 ﹗

见到貌似老板娘的跟佢地坐埋一齐㖞，不知是否亲戚呢？还是熟客？好采不久就埋单离开，即时回复宁静，唉。心情平伏后继续围顾四周，台面既圣诞摆设都几别致，周遭用上橙色柔和灯光非常温暖啊。

约左八点，我六点半已到左尖咀喇，都无地方行，七点半先坐低啦，早到半个钟添！老朋友聚会，饮返杯先，但个个未到，唯有自己队住先。为左打发时间，唯有不停地将 menu 揭上揭落，先计划好 order 什么啦。

去德国餐厅梗系要饮德国啤酒啦，其他酒吧好少有得供应架麻 ﹗我就试试 Helles 啦，味道好香，以前饮过 Kristall 好似有香蕉味，而 Hefe Dunkel 大麦味浓又带少许甘甘地，不错。

依家 19:55 分，朋友们仲未有一个出现，见到德国猪手要等 30-45 分钟，order 定先好㖞，佢地黎到就即刻热辣辣有得食喇 ﹗

德国咸猪手 Pork Knuckle with sauerkraut，一见到碎上我就好怕架喇，会唔会又干争争架？整啖先讲，外皮香脆略硬，骨胶原黏住脆皮之下，胶胶黏黏、咽咽韧韧，质感非常好 ﹗难得肉质不硬而弹，嚼劲非常。

中程度咸香不呛不浊，而且仍能保留少许肉汁，都几满意 ﹗演释手法都系较为港式，幸好出品不错呢，值得一试。德国酸菜腌得非常好，仲好爽口添呢，湿上猪手肉同吃，别有一番风味。薯蓉好香好滑味道浓郁，夹住猪手一齐食超好味 ﹗

暂时系我心目中香港美味猪手排名第 1 位系赤柱 King Ludwig Beerhall，接住系 Biergarden Fass、After 5、德意时，不过最好既猪手当然要飞去德国先食得到啦 ﹗

主角寿星突然迟收工啊，现时 20:30 都仲未到步，我地几个每人两三旧已经消灭左只猪手喇，剩返旧巨形骨头乍，唯有 order 多只，又要再等 30 多分钟喇。

德国肠并盘细 Sausages platter small，多谢 HKD128，大大份物有所值。一早预左香肠会好滞，所以叫细份每人几旧好喇。其实都分唔开什么肠呢，有香草白肉肠、脆皮肠、羊肝肠、猪肉肠，全都好 juicy ﹗

肉汁丰富，皮香肉嫩，烤得燋香飘飘，烤香肠既气味特别芬芳诱人。肉味香浓，肉汁微渗，配埋经加工既芥辣就更加好味。如果配上酸瓜、酸菜又可减低油腻及滞滞感觉，可以食多几旧啊 ﹗而且酸瓜酸菜都腌得非常好味，不过浓不过呛，爽脆多汁。

白汁三文鱼长通粉，个白汁真系坚正呀，香喷喷又幼滑，味道仲十分浓郁，好好食 ﹗长通粉软硬适中有赵口，灌入大量白汁再塞入口，感动到震 ﹗全熟三文鱼鱼味特浓，虽然质感有点干鞋，还可以。

红酒炆牛尾，好大碌㖞，有肉食 ﹗味道唔错，鲜茄酸酸的味道隐约散发出红酒芳香甜味。牛尾炆得非常软棉，红酒汁完全渗入每丝纤维之中，每一口都充满肉汁及酱汁，水润非常。不过温度唔够热，再热一点就更好食一点 ﹗

香草蒜蓉辣汁蚬肉扁意粉，如果蚬肉跟意粉一齐炒会更好食，依家蚬还蚬，意粉还意粉，无咩意义。不过居然用上巨形车厘蚬就较为特别，落足本钱 ﹗车厘蚬味道极鲜而带天然海水咸味，但加埋调味粉就稍咸了一点点。意大利香草扁意粉，香草味突出而霸道，扁意粉咽咽韧韧富弹性，不错不错。

忌廉白酒煮蚬，同意粉一样用上巨形鲜车厘蚬，开心死 ﹗跟一般西餐厅完全唔同。可惜系忌廉白酒汁稀如水，水汪汪般。食唔到白酒同忌廉既味道，幸好车厘蚬好新鲜，原味原味，肥美饱满鲜甜无比 ﹗

烧猪仔骨 baby back rib，非常高质好美味 ﹗肉质软腍得黎又弹又有咬口，肉质唔会腍劈劈、唔会散筲筲。香浓猪肉香味，外层烧得燋香而里面嫩滑有肉汁。调味刚刚好，不过浓不过呛，原汁原味。

德国咸猪手 Pork Knuckle with sauerkraut，第 2 只猪手喇 ﹗刚才大家一时冲动，四个人都赞成叫多一只咸猪手，因为寿星迟到而无食过呢 ﹗不过依家食到尾声，大家都已经饱到食唔落，我又饮左四五杯啤酒，肚都胀晒无位再放食物，唯有就打包返屋企益我阿妈啦 ﹗

哗，个外卖袋好靓呀 ﹗十足商场名店纸袋咁呢。靓女侍应帮我地影相，又帮我地 pack 好碟猪手，thank you thank you。仲好细心连条骨都另外用盒 pack 埋比我，哈哈。

Cova blueberry cheese cake，突然晏昼收到 mission 要买生日蛋糕，我都系谂住尽人事架乍，唔知尖沙咀边度有得买。最初谂住去 agnes b 睇睇有无喇，行行下见到 Cova 啊 ﹗

有缘有缘，见到有几款蛋糕都好靓好吸引，最后决定蓝莓芝士蛋糕，又恰巧 Chris 都钟意食，Happy Birthday ﹗真系好好味呀 ﹗又唔太甜，好香芝士味，口感又滑。蓝苺酸酸甜甜好开胃，好好食 ﹗我都忍唔住连食几块，哈哈 ﹗大家都饱到食唔落喇 ﹗Happy birthday ﹗食饱饱我又返大埔转场再饮喇，哈哈。