鳴 Fusion (已結業)

又系同朋友聚旧嘅时间,今次拣系尖沙咀嘅鸣fusion日式放题,贪佢系大家嘅中间点,够晒方便。可能系星期二嘅关系,我地7点半上到去无乜人,所以唔使等就可以有位坐。呢度点餐方法有啲麻烦,我地要将想食嘅野嘅编号写系点餐纸上面,搞到成日唔记得点左啲乜。野食方面,刺身好新鲜,而且切得几厚,食落好有口感。个人觉得马刀贝同立鱼都唔错。呢度嘅寿司不过不失,最钟意食芥辣八爪鱼,卖相虽然一般,但食落够晒攻鼻,好刺激。熟食方面,推介嘅有一口紫薯年糕,日式牛柳粒同埋烧菠萝。紫薯年糕嘅外层又香又脆,入面系软绵绵嘅紫薯蓉,食落甜而不腻。牛柳粒大小适中,唔太韧亦唔会太生,加埋酱汁嘅香味实在太吸引。烧菠萝又大又厚,而且又多汁,食落清甜。出去攞野饮嘅时候,我发现呢度有我以前中学好钟意饮嘅碧泉蜜桃茶,令我喜出望外。甜品方面就有雀巢雪糕杯同牛奶乐。总括黎讲,呢度野食系水准之上,况且人唔多,钟意静嘅朋友不妨黎试试。