Chatterbox Café (K11 Musea)

营业中

休息中

三年前去新加坡旅行嘅時候，就揀咗住喺文華東方酒店，點知日日玩到醉生夢死，飲飽食醉先返酒店，所以根本都冇機會試吓酒店最出名嘅海南雞飯。難得佢喺香港開業，今日終於的起心肝約咗個friend嚟試吓佢嘅海南雞飯，一雪前恥。餐牌製作精美，有啲仲圖文並茂。首先叫咗啲小食，新加坡近年最興乜嘢都加鹹蛋，什麼鹹蛋魚皮、鹹蛋薯片都大受歡迎，嚟到呢度見到有鹹蛋菜式，就試吓呢個鹹蛋雞翼。六隻鹹蛋雞全翼承惠$78，鹹蛋分布平均，啖啖充滿鹹蛋香味。呢度嘅串燒沙嗲只有雞肉，雞肉非常鮮嫩，仲搽咗蜜糖，甜甜地幾好味。跟住就輪到主角海南雞飯出場，套餐配咗湯、油飯、同埋三款特色醬料，包括有薑蓉、辣椒醬同埋黑豉油。雞肉嫩滑，油飯帶有雞油香。最後仲食咗甜品，揀咗個帶有港式風味嘅紅豆涼粉刨冰，雪糕係雲呢拿味，食完透心涼。雖然味道唔錯，但我仍然渴望可以搭飛機飛去新加坡，試吓正宗嘅海南雞飯，同埋享受真正五星級酒店嘅服務。