譽宴 (已結業)

Item: 譽宴
Rating: 3
Author: 奥志雷

U-Banquet

3.5

21 食记

味道

环境

服务

卫生

抵食

415

佐敦

$101-200

粤菜 (广东) 火锅点心酒楼

奥志雷

等级4

2.1K

都系𠮶句，恭喜晒 ﹗行程紧密！粉岭长华邨、鹤薮水塘、大埔凤园、三门仔、上水、大埔、佐敦，今晚饮完再大埔最后上水，困死我咩！罗生罗太美酒佳肴，鸿运乳猪全体、碧绿蚌片虾仁、银湖蟹肉双翡翠、黄金鹅肝海螺酥、红烧竹笙鸡丝翅、生扣南非原只鲜鲍鱼、清蒸大海石斑、一品脆香烧鸡、汤州炒饭、干烧伊面、百年好合、甜甜蜜蜜。

一年前都系依个场饮喜宴，内笼无变，连菜单都系大同小异。食野要紧，唔饮酒比较安全，整壸铁观音先。阿姐劲闻塞啰，我都话要铁观音咯，系都要比潽洱我 ﹗都叫您成壸茶放低咯，系都要攞走，唔通我次次叫您埋黎酙咁麻烦咩 ﹗激鬼死 ﹗好采最尾都换返铁观音成壸放系我面前，一早叫您地咁做架啦 ﹗

不饮不饮还需饮，好啦 ﹗好啦 ﹗饮一杯好喇，饮胜 ﹗一开始就停唔到啦，一二三四五六七杯 ﹗叫左您地唔好迫我咯。罗生罗太签完结婚证书，祝埋酒就可以开饭喇 ﹗请大力鼓掌 ﹗

鸿运乳猪全体，今日我地依枱坐无虚席，坐足 12 位食家呢 ﹗仲想贪心食多几份添，哈哈。今次依只猪得㖞 ﹗身材好 fit，三层 layer 清晰可见又平均，脆皮、滑膏、瘦肉，各自各精采，瘦肉猪肉味浓，咸香清爽不混浊，好味 ﹗

碧绿蚌片虾仁，上次系西兰花虾球珊瑚蚌，今次换黎蜜糖豆虾球蚌片，颜色鲜艳夺目，卖相吸引，仲香喷喷添，赞 ﹗我食野就最唔客气架喇，黎招连环拳，每款夹几旧先。虾肉好爽甜又新鲜呢，好开心啊 ﹗蚌片就好腍，不过带淡淡海螺味，都满意。蜜糖豆非常爽甜多汁，食到索索声。我都系近年先开始食到甜椒架乍，以前觉得太重草青味食唔到，依家就觉得爽甜清新好味道啰。

银湖蟹肉双翡翠，银湖？真系估唔到会系咩黎，原来系蛋白花呢。始终拆解唔到咩系双翡翠，都系得西兰花乍㖞，应该打错字啫。草菇虽然系罐头货，但处理得宜无涩味，仲甜美多汁菇味浓。西兰花脆卜卜又爽口，混上鲜甜蟹肉芡非常冶味啊 ﹗

黄金鹅肝海螺酥，似乎食材跟海螺无咩关系，应该系个外观卷到似海螺啫，我起个名为千丝鹅肝卷啰。创意同外观都满分，但味道上就差左少少，整个口感都非常干燥，味道又非常单调带油腻，鹅肝味好弱，完全食唔到，配返个醒胃带酸既汁会更好。

红烧竹笙鸡丝翅，食翅系无需加醋架呢，醋只系食完用作解解胶质啫。汤底香浓，啖啖都有料，鸡丝翅针挂上大量高汤冲入口，美味极了 ﹗爽呀 ﹗食完呷啖醋，舒服晒 ﹗

生扣南非原只鲜鲍鱼，又有鲍鱼食喇，梗系要成只咬先够豪气啦，用刀切会破坏左佢既质感及影响味道架 ﹗狠狠地咬啖先，好鲜啊 ﹗蚝汁扣得入味，鲍肉弹弹的，一啖未食完已经想咬下一啖喇，好好味 ﹗新鲜爽嫩生菜撞上鲍鱼蚝汁点会唔好食呀 ﹗仲要大大啖不停地塞入口添呀 ﹗

清蒸大海石斑，有朋友仔已经食饱，咁我可以全力开动喇 ﹗大量鱼肉捞上蒸肉豉油扫入口，大满足 ﹗鱼肉结实带点滑，鱼骨鱼尾鱼鳍无一幸免，被我啜得干干净净 ﹗连两块极品面珠登都全收到我肚里去，唔好意思喇 ﹗好味道 ﹗

一品脆香烧鸡，皮香肉嫩，薄薄外皮脆卜卜。髀肉超级幼嫩，胸肉都好腍唔会鞋，只系鸡味好淡，点黑糖豉油都几好味噃。汤州炒饭，都几多料㖞，似乎食得下，试左先讲 ﹗都系偏淡又无镬气又湿，麻麻地。干烧伊面，今次终于合格喇 ﹗虽然都系腍左少少，但味道特浓，当系捞面都唔错。