釣魚翁 燒鵝．海鮮飯店 (已結業)

好耐无去过乌溪沙饮茶，因为食过几次都觉得麻麻，又唔抵食，所以好一段时间都无去。不过妈咪之前同朋友食过话好食左，今次就带我去食多次。煎得好靓嘅花枝饼，热辣辣好好味。个花枝饼唔会好粉，咬落都有啲墨鱼粒，加埋香甜嘅粟米好好味。热辣辣嘅虾肠，啲虾好大只，唔可以话好新鲜，但系至少无雪味同埋都几鲜甜爽口。不过配生菜就唔系好夹，如果换成韮皇就正（当然韮皇又贵啲喇）。烧鹅濑，竟然系脾位。啲烧鹅烧得好腍好滑，个皮系脆嘅，超正！个粉同汤就正常。呢个牛根炆得好腍，又系好好味。不过对于佢个汁我就唔系好钟意，但唔系难食嘅。仲有一旧牛根腩喺入面。最后嘅甜品，呢个椰汁糕十级推介。软硬度适中，食落好香嘅椰汁味，但系又唔会好甜，劲推介！整体嚟讲，食物质素提升左。虽然唔算系好平，不过性价比高，唔叫好贵但好味，同埋够近，系马鞍山区最高质嘅酒楼。除左因为全部都系热辣辣之外，食材都新鲜左，大家可以去试下。