Crostini Bakery & Cafe (已結業)

细个嘅时候过生日，妈咪买个蛋糕庆祝已经好高兴，唔会理咩味咩造型。人慢慢长大，对食物嘅要求越来越高，我觉得系呢个繁华嘅都市造就咗一班嘴刁嘅平民，其实应该要感激，皆因生存于香港。言归正传，讲到呢间饼店～一开始就系我同朋友抱怨，而家啲连锁西饼店越来越多，仲要总要一家喺你附近，随手可得嘅方便令要求降低到只求外型而忽略咗内在。于是得到朋友推荐，不如试下crostini？第一次试嘅系婆婆生日嘅时候，买咗个柚子慕斯，特别为大家抄袭咗佢哋官网嘅形容：“清甜的柚子乳酪慕丝配上香软的杏仁海绵蛋糕、柚子及椰子奶油夹心，为你提供一个清新香甜之选。”完美诠释，最重要嘅系佢唔会好甜，口感更一流，融于口嘅美味，那次，婆婆笑到见牙唔见眼。第二次系同男友嘅周年纪念，不过由于我哋嘅纪念日唔系情人节之类嘅大日子，所以爱慕呢款蛋糕系要预订嘅。店舖职员都好细心，由预订到取货都跟好足。呢款蛋糕以红桑子夹心，配白朱古力慕丝，有少少酸软甜美，即使对朱古力诱惑麻麻啲嘅男友都觉得好味。下次，再有需要，都会选择crostini。店内仲有提供堂食及咖啡，有时间hea嘅话都系好好嘅选择。